Archive

Archive for the ‘Падзеі’ Category

Беларусы ў Канадзе супраць інтэграцыі Беларусі ў Расею!

7 лістапада 2019 г. Згуртаваньне Беларусаў Канады зарганізавала ў Таронта, Канада пікет супраць інтэграцыі Беларусі з Расеяй. Нягледзячы на сапраўднае зімовае сьнежнае надвор’е беларускія актывісты прыйшлі да Беларускага Цэнтару, які стаіць на зямлі, што належыць Парафіі Сьв. Кірылы Тураўскага ў Таронта (БАПЦ). 


Сымбалічна, што падчас пікетаваньня над удзельнікамі лунаў вялізны Бел-Чырвона-Белы Сьцяг, што стаўся пранесеным беларусамі Канады па вуліцах Вільні 22 і 23 лістапада падчас ўрачыстасьцяў па пахаваньню Герояў вызвольнага паўстаньня 1863-1864 гг. У пікеце. прынялі ўдзел Старшыня Галоўнае Ўправы ЗБК доктар Алена Лявончанка, Старшыня Канадыйскага Сэктару Рады БНР Алесь Кот, актывісты Згуртаваньня. Падчас пікетаваньня Алесь Кот меў кароткую прамову. 

Спасылка на видэа:

https://drive.google.com/file/d/1IK1pSsEyU4iGiLBldxd3SI1hJj31Q32e/view?usp=sharing

Ўсе удзельнікі пікету атрымалі ў падарунак па два вялікіх значкі, што сталіся прэзентаванымі спецыяльна беларусам Канады – ўдзельнікам ўрачыстага пахаваньня Герояў-Каліноўцаў – прадстаўнікамі Беларускага Грамадзкага Камітэту  ў Вільні 22 лістапада 2019г.

Алесь Кот

Categories: Падзеі

АБ ПАГРОЗЕ НЕЗАЛЕЖНАСЬЦІ БЕЛАРУСІ

АКТУАЛЬНЫЯ ДАКУМЭНТЫ РАДЫ БНР

АБ ПАГРОЗЕ НЕЗАЛЕЖНАСЬЦІ БЕЛАРУСІ – ЗАЯВА

ПАДПІСАНТАЎ ВІЛЕНСКАГА МЭМАРАНДУМУ

1.12.2019RADABNR

У дзень XXX Сэсіі Рады БНР адбылася сумесная нарада падпісантаў Віленскага мэмарандуму 2012 г. – прадстаўнікоў галоўных беларускіх дэмакратычных партыяў і грамадзкіх арганізацый. Па выніках абмеркаваньня бягучай сытуацыі вакол магчымага падпісаньня афіцыйным Менскам і Крамлём дакумэнтаў аб далейшай інтэграцыі Беларусі і Расеі было вырашана прыняць заяву, тэкст якой падаем ніжэй.

АБ ПАГРОЗЕ НЕЗАЛЕЖНАСЬЦІ БЕЛАРУСІ

Сумесная заява падпісантаў Віленскага мэмарандуму (2012), прадстаўнікоў палітычных партыяў, рухаў, грамадзкіх арганізацыяў

Мы, падпісанты Віленскага мэмарандуму 2012 году, прадстаўнікі дэмакратычных партыяў, рухаў, грамадзянскай супольнасьці Беларусі сумесна з Радай Беларускай Народнай Рэспублікі:

— зьвяртаем увагу беларускага народу і міжнароднай супольнасьці на небясьпечны намер кіраўнікоў Расеі і Беларусі Ўладзіміра Пуціна і Аляксандра Лукашэнкі падпісаць 8 сьнежня сёлета дамовы, якія замацоўваюць залежнасьць Беларусі ад Расеі ды патэнцыйна пагражаюць самому далейшаму існаваньню Беларусі як незалежнай сувэрэннай дзяржавы;

— нагадваем, што беларускі народ стагодзьдзямі змагаўся за сваю незалежную дзяржаўнасьць, паклаўшы ў барацьбе спачатку з Расейскай, а затым з камуністычнай савецкай імпэрыяй незьлічоную колькасьць жыцьцяў, і гэтыя ахвяры не забытыя;

— падкрэсьліваем, што лёсавызначальныя для беларускага народу пагадненьні рыхтуюцца ў поўнай сакрэтнасьці, без якіх бы ні было кансультацыяў з прадстаўнікамі грамадзкасьці. Ніводзін праект дакумэнта не апублікаваны. Нават „дэпутаты парлямэнту“ ня здолелі атрымаць хаця б мінімальную інфармацыю ад ураду Беларусі;

— зазначаем, што ініцыятары інтэграцыі абгрунтоўваюць cвае дзеяньні вынікамі праведзенага ў Беларусі ў 1995 годзе рэфэрэндуму, адным з пытаньняў якога была эканамічная інтэграцыя з Расеяй. Але рэфэрэндум быў прызначаны насуперак Канстытуцыі і заканадаўству, у тым ліку шляхам зьбіцьця збройнымі падразьдзяленьнямі спэцслужбаў дэпутатаў апазыцыі непасрэдна ў залі парлямэнту, ён праходзіў з шматлікімі фальсыфікацыямі і не зьяўляецца сапраўдным волевыяўленьнем беларускага народу;

— заяўляем, што ад моманту абраньня Лукашэнкі прэзыдэнтам у 1994 годзе, у Беларусі не было свабодных і справядлівых выбараў, а ў лістападзе 1996 адбыўся канстытуцыйны пераварот і парлямэнт быў гвалтоўна распушчаны. У часе апошняй выбарчай кампаніі ў “палату прадстаўнікоў” значная частка непраўладных кандыдатаў не была дапушчаная да рэгістрацыі, нідзе назіральнікі не былі дапушчаныя да падліку галасоў, на шмат якіх участках зафіксаваныя іншыя парушэньні. У “парлямэнт” не прапушчаны ніводзін непраўладны кандыдат. Такім чынам, у Беларусі няма легітымнай заканадаўчай улады, а значыць, любыя дамовы, падпісаныя цяперашняй ўладай, апрыёры неканстытуцыйныя;

— нагадваем, што ў пачатку 1990-х гадоў Беларусь добраахвотна адмовілася ад ядзернай зброі, даверыўшыся гарантыям свайго сувэрэнітэту, сфармуляваным у так званым Будапэшцкім мэмарандуме, падпісаным ЗША, Вялікай Брытаніяй і Расеяй. Аднак абмежаваньне сувэрэнітэту Беларусі аж да пагрозы інкарпарацыі з боку Расеі, якая пад уладай Пуціна вядзе палітыку агрэсіўнай ваяўнічай імпэрыі, можа стварыць прынцыпова іншую і вельмі небясьпечную геапалітычную сытуацыю ў Эўропе: расейскае войска апынецца на 600 кілямэтраў бліжэй да эўрапейскіх сталіц.

Мы пацьвярджаем пазыцыю, заяўленую ў Віленскім мэмарандуме 2012 году: “Суб’ектам і першасным гарантам незалежнай дзяржаўнасьці Беларусі і нацыянальна-культурнай пэрспэктывы беларусаў ёсьць сам беларускі народ, які павінен сьцьвярджаць сваю палітычную волю ва ўмовах свабоды“.

Мы падкрэсьліваем, што кансэрвацыя антыдэмакратычнай, не падсправаздачнай народу, пазбаўленай дэмакратычна-канстытуцыйнай легітымнасьці ўлады ў Беларусі толькі ўзмацняе пагрозу незалежнасьці краіны.

Мы заклікаем дэмакратычныя дзяржавы сьвету, у тым ліку тыя, што падпісвалі Будапэшцкі мэмарандум, а таксама Эўрапейскі Зьвяз асудзіць любыя спробы Расейскай Фэдэрацыі абмежаваць сувэрэнітэт Беларусі, выкарыстоўваючы адсутнасьць у Беларусі дэмакратычна выбранай улады, а таксама выступіць з ініцыятывай гарантыяў незалежнасьці Беларусі на міжнародна-праўнай аснове.

Алена Анісім, старшыня Таварыства беларускай мовы імя Скарыны

Рыгор Кастусёў, старшыня партыі БНФ

Станіслаў Шушкевіч, старшыня Вярхоўнага Савета 12-га скліканьня

Юрась Беленькі, намесьнік старшыні Кансэрватыўна-хрысьніянскай партыі БНФ

Вінцук Вячорка, падпісант Віленскага Мэмарандуму

Павал Севярынец, сустаршыня аргкамітэту Беларускай хрысьціянскай дэмакратыі

Алена Талстая, сустаршыня Руху салідарнасьці “Разам”

Мікола Казлоў, выканаўца абавязкаў старшыні Аб’яднанай грамадзянскай партыі

Анатоль Лябедзька, дырэктар цэнтру “Эўрапейскі дыялёг”, дэпутат Вярхоўнага Савета 12-га і 13-га скліканьняў

Ад Рады Беларускай Народнай Рэспублікі – Івонка Сурвілла, старшыня Рады БНР

1 сьнежня 2019

Заява адкрытая для падпісаньня.

Categories: Падзеі

ЗАПРАШАЕМ НА КАЛЯДНЫ ФЭСТ 2019!

Субота, 14 снежня, 2019, 5:30 вечара 

Беларускі грамадзка-рэлігійны цэнтар,

524 St.Clarens Ave, Toronto, M6H 3W7

14 СНЕЖНЯ, СУБОТА, 5:30 ВЕЧАРА

ЗАПРАШАЕМ НА КАЛЯДНЫ ФЭСТ 2019!

5:30pm – 6:30pm МАЙСТАР-КЛАС НА ВЫБАР:

– “Саламяны анел” (пляценне з саломкі)

– “Каляднае печыва” (роспіс самаробнага печыва)

6:30pm – 8:30pm:

– Беларуская вячэра

– Традыцыйнае каляднае шоу з казой (Фольк-гурт “Яваровы Людзі”)

– Штогадовая калядная прэмія “Залаты Шчадрэц”

– Калядны баль у князя Радзівіла: сярэднявечныя беларускія танцы

Дарослы квіток $20/ Дзiцячы квіток10$

Адрас: 524 St.Clarens Ave, Toronto, M6H 3W7

Інфармацыя і рэгістрацыя: 647-505-2956, irynatoustsik@gmail.com, Facebook: @ZBK.Toronto

_ _ _

Згуртаванне Беларусаў Канады

Categories: Падзеі

ДЗЕНЬ ГЕРОЯЎ 2019! Субота, 16-га лістапада а 6:00 вечара

Беларускі грамадзка-рэлігійны цэнтар,

St.Clarens Ave 524, Toronto, M6H 3W7

Дарагія Сябры!

Згуртаванне Беларусаў Канады запрашае дзяцей і дарослых на

 ДЗЕНЬ ГЕРОЯЎ 2019! Субота, 16-га лістапада а 6:00 вечара  Праграма:

* Урачыстая частка, у якой прыме ўдзел Старшыня Рады БНР Івонка Сурвілла

* Нарысы з гісторыі беларускай Незалежнасці
* Вялікі спеўны сход – у першыню ў Таронта!

* Госці з Атавы – Прэзентацыя кнігі паэта Юрася Шамецькі “Непрадказальнае”  у суправаджэнні музыкальнага дуэта “Кантабіле”

* Кава/гарбата/пачастункі 

Уваход вольны, але ахвяраванні вітаюцца


Адрас: 524 St.Clarens Ave. Toronto

Даведкі па тэл.  416.876.8603

Facebook: @ZBK.Toronto

_ _ _

Згуртаванне Беларусаў Канады

Categories: Падзеі

Этна-гурт Тройца ў Канадзе

17-20 кастрычніка ў канадыйскім горадзе Таронта візітавала этна-трыа ”Тройца”. Гурт заснаваны ў 1994 г. вядомым зьбіральнікам фальклёру Іванам Кірчуком. У сучасны склад гурта таксама ўваходзяць барабаншчык Юры Паўлоўскі і гітарыст Юры Дзмітрыеў. За час свайго існаваньня гурт даў сотні канцэртаў  у шмат якіх краінах сьвету, у тым ліку ў Нямеччыне, Галяндыі, Аўстрыі, Вугоршчыне, Польшчы, Гішпаніі, Швайцарыі, Бельгіі, Партугаліі, Славеніі, Харватыі, Эстоніі, Летуве, Латвіі, Расеі Чылі, Малайзіі.

І, нарэшце, візітаваньне ў Паўночнай Амэрыцы з адзіным канцэртам у канадыйскім горадзе Таронта 18 кастрычніка. Візіту гурта папярэднічала шматмесячная інтэнсіўная рэкляма ў сацыяльных сетках. І вось 17 кастрычніка апоўдні разышлася навіна са здымкамі з аэрапорту Пірсан: ”Тройца”  ў Таронта!” 18 кастрычніка – знаёмства з месцам, дзе павінен адбыцца канцэрт, абсталяваньнем, музычнымі інструмэнтамі, праверка гуку.

Dоўгачаканы пятнічны вечар. У Таронта  прыбылі нашыя суродзічы з розных гарадоў Антарыё. У памяшканьні клюбу беларуская гамонка сотняў людзей. Прыўзьняты настрой у прысутных. У праграме этна-трыа гучалі сьпевы ”Русальная”, ”Вясельная Мар’я”, ”Шэльма”, ”Яблынь мая” ( карагодная), ”Семь чарак гарэлкі”, ”Зіма з Летам”, ”Купальская -Канапелька”, ”Мядзьведзь”, інш. Гэта трэба было бачыць, якоя карагоды вадзілі ў залі клюба пад сьпевы ”Тройцы”! Нязвычайная чаруючая музыка, нязвычайныя словы сьпеваў, нязвычайнае адзеньне Майстра, нязвычайныя адчуваньні аўдыторыі. Чаканьні спраўдзіліся.  Мары здзейсьніліся. Цуд здарыўся.
З выказваньняў аднаго з тых, хто пабываў на канцэрце: ”Падавалася, што ўся беларуская грамада правінцыі сабралася ў Моd Тheatre Club. Шыкоўнае выступленьне. Зацэньваю на дзесяць з дзесяці. Усе вельмі задаволены. Выдатнае дэманстрацыя нашага нацыянальнага мастацтва праз сучасныя формы выкананьня! Жыве Традыцыя! Жыве Беларусь!”

Наслухаўшыся ўражаньняў ад канцэртнае праграмы ”Тройцы” беларусы Вялікага Таронта, што ня мелі магчымасьці трапіць у Моd Тheatre Club у пятніцу, у сыботу 19 кастрычніка пацягнуліся ў даунтаун мегаполіса, дзе на Сэнт Клэрэнс авеню ў цагляным будынку Цэнтару мелася адбыцца сутрэча з легендарным гуртом. Парахвія Сьв. Кірылы Тураўскага (БАПЦ), Згуртаваньне Беларусаў Канады, Арт-Гасьцёўня ”Родны Край” і галоўны спонсар DK Transportation зарганізавалі сумесную з этна-трыа ”Тройца” сяброўскую вячэру, аўтограф-сэсію і прэзентацыю на тэму ”Магія Беларускага Фальклёру” ад лідара гурта Тройца” беларускага музыкі, кампазітара, фалькларыста, выкладчыка Івана Кірчука. 

Ягоная 45-хвілінная лекцыя літаральна зачаравала запоўненую залю Беларускага Цэнтару ў Таронта. Дзіўныя гучаньні, прадуцыруемыя разнастайнымі музычнымі інструмэнтамі, перамяжаліся сьпевамі незвычайных тэмбраў з багатаю гамаю гукавых адценьняў. Што прыемна было назіраць, нават звычайна гаманлівыя дзеткі, якіх бацькі з выхаваўчаю мэтаю прывялі с сабою й на гэты раз, глядзелі й слухалі не варухнуўшыся. Распаволены бадзёры стыль кіраваньня вечарынаю Ірыны Тоўсьцік спрыяў агульнаму настрою, раслабленасьці прысутных. 


Безумоўна, тую дзею, што мела месца ў прыгожы сыботні вечар ў Беларускай Хаце, трэба сапраўды бачыць і чуць, каб зацаніць хараство высокага майстэрства. Па сканчэньні монаспектаклю  больш за 70 удзельнікаў вечарыны стоячы працяглымі авацыямі шчыра дзякавалі  Івану Кірчуку, Юру Паўлоўскаму і Юру Дзмітрыеву.

Першаярах БАПЦ Архіяпіскап Сьвятаслаў, Старшыня Галоўнае Ўправы Алёна Лявончанка падзякавалі ўдзельнікам эта-трыа ”Тройца” за прыгожы расповед, музыку, сьпевы, за сьвята, падараванае Беларускай грамадзе ў Канадзе. Апрануты ў старажытныя літвінскія строі Алесь Кот выказаўшы колькісь добрых словаў у адрас ”Тройцы” ад імя прысутных ў залі удзельнікаў мастацкае вечарыны аддзякаў артыстам кнігамі, заўважыўшы, што прэзентуемыя выданьні з разраду тых, што ў Беларусі не друкуюцца з-за забароны. Кожны з сябраў этна-трыа атрымаў кніжкі  ”Беларускія фестывалі й выстаўкі ў Ню-Дзэрзі” Янкі Запрудніка,  ”Мова ў гісторыі беларускага пісьменства” (факсімільнае выданьне) Аўгена Калубовіча, ”Дэпутаты Незалежнасьці’ С. Навумчыка і Зянона Пазьняка ‘,  ”Палын-палын” Зянона Пазьняка. Асабіста кіраўніку ”Тройцы” Івану Кірчуку сталася ўручанаю кніга ”Тэрра Дэй” Зянона Пазьняка, а ўсяму гурту – чырвона-бел-чырвоны канадыйскі сьцяг.

Затым чарга да спадара Івана за аўтографамі, што ён пакідаў на аўдыёдысках і праграмках, прыкладзеных да набытых нашымі суродзічамі прыгожых з выяваю этна-трыа ”Тройца” маек. Узрушаныя ўбачаным і пачутым у гэты дзень людзі не разыходзіліся з Беларускага Цэнтару Таронта амаль да паўночы. Шэсьць гадзінаў прыемнага адпачынку, напоўненых разнастайна аранжыраваным артыстамі і арганізатарамі шоў, незабыўнымі уражаньнямі ад прафесійна выкананых мелёдыяў, легендаў, сьпеваў з нашае далёкае беларускае мінуўшчыны, сустрэчаў са знаёмымі, абмену думкамі за келіхам добрага віна й смачнаю ежаю.

Колькі пазітыву ўнесена ў жыцьцё нашых суродзічаў на Чужыне! Пачуцьцё дакрананьня да роднага, адчуваньне духоўнае сувязі з Бацькаўшчынай – тое, што так патрэбна нам эмігрантам, каб ня сканаць aд бяздухоўнасьці. Каб ня спраўдзілася сказанае аднойчы ў роспачы: ”У заможнай далечы, у духоўнай галечы душу беларуса лёс пакалечыў…”  

Рэспект і падзяка сябру беларускае суполкі ў Канадзе Зьміцеру Леановічу, хто больш за год таму ўзяўся за арганізацыю першага візітаваньня легендарнага этна-трыа ”Тройца” у Паўночную Амэрыку і давёў справу да лягічнага канца.

Алесь Кот

Categories: Падзеі

Вячэра з Троіцай

Categories: Падзеі

Канцэрт Троіцы ў Таронта 18 кастрычніка

Categories: Падзеі