У БЕЛАРУСІ АДСУТНІЧАЮЦЬ УМОВЫ ДЛЯ ДЭМАКРАТЫЧНЫХ ВЫБАРАЎ ПРЭЗЫДЭНТА – ЗАЯВА РАДЫ БНР

Зважаючы на абвяшчэньне афіцыйнымі ўладамі Беларусі выбараў Прэзыдэнта Рэспублікі Беларусь на 9 жніўня 2020 г. і на пачатак вылучэньня кандыдатаў, Рада Беларускай Народнай Рэспублікі заяўляе наступнае:

1. На дадзены момант у Беларусі надалей адсутнічаюць умовы для правядзеньня свабодных і дэмакратычных выбараў, якія б адпавядалі як міжнародным стандартам, у тым ліку міжнародным абавязальніцтвам Рэспублікі Беларусь, так і літары і духу дзеючага законадаўства Рэспублікі Беларусь. Створаныя перашкоды для вылучэньня кандыдатаў, альтэрнатыўных А. Лукашэнку. Сярод іншага, адсутнічаюць умовы для правядзеньня выбарчай кампаніі, у якой усе кандыдаты мелі б аднолькавыя магчымасьці, а таксама для прадухіленьня адміністратыўнага ціску на выбарцаў. Адсутнічаюць умовы для незалежнага кантроля і назіраньня за працэсам падліку галасоў, што ў чарговы раз стварае небясьпеку масавых фальсыфікацый вынікаў галасаваньня.

2. Зважаючы на незаконнасьць рэфэрэндума 2004 года, па выніках якога было скасаванае абмежаваньне колькасьці тэрмінаў, якія адна асоба можа займаць пасаду прэзыдэнта, А. Лукашэнка ня мае законнага права вылучаць сваю кандыдатуру на выбарах прэзыдэнта Рэспублікі Беларусь.

3. Пандэмія каранавіруса стварае дадатковыя рызыкі, зьвязаныя з арганізацыяй і правядзеньнем выбараў у гэты пэрыяд. Правядзеньне масавых мерапрыемстваў, у тым ліку выбараў, у час пандэміі стварае пагрозу здароўю і жыцьцям грамадзянаў Беларусі.

Спасылаючыся на сваю заяву ад 13 кастрычніка 2015 г., прысьвечаную папярэднім выбарам Прэзыдэнта Рэспублікі Беларусь, Рада БНР надалей заклікае ўлады Рэспублікі Беларусь і ўсе зацікаўленыя бакі:

– Гарантаваць грамадзянам Беларусі дэмакратычныя правы і свабоды, замацаваныя ў тым ліку ў дзеючым законадаўстве Рэспублікі Беларусь і міжнароднымі дамовамі, падпісанымі Рэспублікай Беларусь;

– Стварыць у Беларусі перадумовы для правядзеньня паўнавартасных свабодных і справядлівых выбараў, пасьля чаго правесьці ў адпаведнасьці з законадаўствам Рэспублікі Беларусь і міжнароднымі дэмакратычнымі стандартамі перавыбары ва ўсе органы дзяржаўнай і мясцовай улады.

Рада БНР надалей заклікае міжнародную супольнасьць спрыяць дэмакратызацыі Беларусі і ажыцьцяўляць ціск на афіцыйныя ўлады Рэспублікі Беларусь з гэтаю мэтай.

Спасылаючыся на сваю заяву ад 31 сакавіка 2020 г., Рада БНР заклікае беларускія ўлады да адкрытасьці і адказнасьці перад беларускім грамадзтвам і патрабуе неадкладна прыняць усе неабходныя меры дзеля забесьпячэньня аховы здароўя людзей ва ўмовах пандэміі.

Рада Беларускае Народнае Рэспублікі заяўляе, што дэмакратычныя выбары, павага да правоў чалавека і свабода слова – гэта адзіны магчымы шлях да нацыянальнай кансалідацыі беларусаў, выхаду зь міжнароднай ізаляцыі, у якой Беларусь знаходзіцца апошнія дзесяцігодзьдзі, а таксама адзіны шлях для абароны незалежнасьці Беларусі ва ўмовах пагрозы з боку сёньняшняй нацыяналістычнай і аўтарытарнай Расеі.

Categories: Падзеі

Памяці АНАТОЛЯ ІВАНАВІЧА ХРАНОЎСКАГА (3.03.1934 – 31.03.2020)

Анатоль Іванавіч Храноўскі, добравядомы дзеяч беларускай эміграцыі ў Паўночнай Амерыцы, пакінуў нас 31 сакавіка 2020 года. Анатоль Іванавіч Храноўскі нарадзіўся 3 сакавіка 1934 года ў Слоніме. Пасьля другой сусьветнай вайны разам з бацькамі вымушана апынуўся на Захадзе, а з 1949 года прыехаў у Манрэаль, дзе правёў найбольш актыўную частку свайго жыцьця. Анатоль Іванавіч Храноўскі пакінуў пасля сябе цудоўную сям’ю, жонку Крыстыну, дачок, Ларысу і Алёну, сыноў Антона і Рыгора, унукаў.

Анатоль Іванавіч Храноўскі 
(ля свайго дома ў Саттон, 2006)

Ён быў выключна працавітым і здольным чалавекам, больш таго – грунтоўным, меў сілы збудаваць дом і катэдж, адчыніць дзьверы для добрага жыцьця сваім дзецям. Сп. Анатоль Храноўскі быў чалавекам шырокай і шчодрай душы, надзелены богам і прыродай розумам, які яднаў яго разам з сям’ёй і з радзімай, што засталася за акіянам.
Калі казаць пра грамадскае, беларускае жыцьцё Анатоля Іванавіча ў Канадзе, то трэба ў першую чаргу сказаць, што ён быў сябрам Рады Беларускай Народнай Рэспублікі. На мой погляд ім было зроблена настолькі шмат для беларускай справы ў Манрэалі, што ён меў адмысловае права, як ніхто іншы, быць у складзе нашага парламента і ўрада БНР на выгнаньні. У 1989 годзе ён арганізаваў Згуртаваньне Беларусаў у Квебеку, якое узначальваў на працягу 25 гадоў. Кожны год у Манрэалі адзначаліся Дні незалежнасьці БНР, куды таксама часам прыязджалі беларусы з Атавы і Таронта. Дзякуючы яго намаганьням беларусы былі прадстаўлены на розных значных падзеях і мерапрыемствах, дзе ўдзельнічалі людзі розных культур, што жывуць у Канадзе; у прыватнасьці пры яго непасрэдным удзеле і з яго ініцыятывы былі арганізаваны беларускі куточак ў Saint Joseph Oratorium (Montreal), беларуская частка выставы ў музеі розных культур у Rawdon.

Чытаць далей…

Categories: Навіны

Памерла Паўліна Сурвіла, выканаўчы дырэктар Цэнтру беларускіх дасьледаваньняў у ЗША

На 57-м годзе жыцьця ад цяжкай хваробы памерла Паўліна Сурвіла, прафэсар амэрыканскага Wartburg College (штат Аёва), выканаўчы дырэктар Цэнтру беларускіх дасьледаваньняў у Канзасе, сябра Рады БНР.

Паўліна (поўнае імя — Паўліна Марыя) Сурвіла нарадзілася 2 лютага 1964 г. ў Мадрыдзе, дзе ў той час яе бацькі — Івонка Сурвіла (Шыманец) і Янка Сурвіла рабілі беларускія праграмы на Гішпанскім радыё. Была другім дзіцём у сям’і (яе сястра Ганя на тры гады старэйшая). «Яны з самага маленства прысутнічалі ўсюды, дзе штосьці беларускае рабілася», — прыгадвала пазьней пра сваіх дзяцей у інтэрвію Радыё Свабода старшыня Рады БНР Івонка Сурвіла.

Івонка Сурвіла разам з дочкамі Паўлінкай і Ганяй каля Мадрыду, 1969. Фота Янкі Сурвілы.
Івонка Сурвіла разам з дочкамі Паўлінкай і Ганяй каля Мадрыду, 1969. Фота Янкі Сурвілы.
Паўліна Сурвіла ў 1972 у Беларускім рэлігійна-грамадзкім цэнтры ў Таронта, на выставе сваіх твораў
Паўліна Сурвіла ў 1972 у Беларускім рэлігійна-грамадзкім цэнтры ў Таронта, на выставе сваіх твораў

Паўліна служыла ў якасьці музыкі ў канадыйскім войску, скончыла ўнівэрсытэт, магістаркую працу пісала пра беларускую дыяспару. Абараніла доктарскую дысэртацыю Апошнія гады была прафэсарам Вартбурскага коледжу (штат Аёва) і вывучала праблемы фармаваньня нацыянальнай ідэнтычнасьці ў постсавецкай Беларусі. Аўтар навуковых працаў і кніг, прысьвечаных беларускай музыцы, адна зь іх — «Пра русалак і рок-сьпевакоў» — прысьвечаная сучасным выканаўцам.

З’яўляецца Выканаўчым дырэктарам створанага ў 2007 віцэ-прэзыдэнтам Паўднёва-заходняга каледжу Джэймсам Шэпардам і першым амбасадарам ЗША ў Беларусі Дэвідам Сўорцам Цэнтру беларускіх дасьледаваньняў у Канзасе (ЗША), першай акадэмічнай установы ў ЗША, якая займаецца вывучэньнем выключна Беларусі. Пры спрыяньні Цэнтру некалькі беларускіх навукоўцаў прайшлі стажыроўкі ў ЗША. Паўліне Сурвіле ўдалося прыцягнуць да супрацоўніцтва многіх вядомых асобаў, у тым ліку і зь Беларусі, як, напрыклад, былога старшыню Вярхоўнага Савета Станіслава Шушкевіча. Радыё Свабода была мэдыйным партнэрам Цэнтру.

Паўліна Сурвіла разам з першым амбасадарам ЗША ў Беларусі Дэвідам Сўорцам. Канзас, ЗША, 2008 год
Паўліна Сурвіла разам з першым амбасадарам ЗША ў Беларусі Дэвідам Сўорцам. Канзас, ЗША, 2008 год

Паўліна Сурвіла арганізавала дзясяткі навуковых канфэрэнцыяў, сэмінараў, лекцый, прысьвечаных гісторыі і сучаснасьці Беларусі, а таксама — яе будучыні. Паўліна заахвочвала навукоўцаў, палітыкаў, творцаў дапамагаць Беларусі рабіцца дэмакратычнай сучаснай краінай.

Паўліна Сурвіла, Івонка Сурвіла і Станіслаў Шушкевіч у часе нефармальнай сустрэчы. ЗША, 2008
Паўліна Сурвіла, Івонка Сурвіла і Станіслаў Шушкевіч у часе нефармальнай сустрэчы. ЗША, 2008

Паўліну Сурвілу зьвязвала сяброўства з Радыё Свабода, яна ўдзельнічала ў нашых перадачах. 31 сьнежня 2010 году Паўліна Сурвіла зачытала на хвалях Свабоды імёны арыштаваных (сярод тых, хто чытаў імёны, былі Вацлаў Гавэл, Алена Бонэр, а. Аляксандар Надсан, Джордж Буш-малодшы, Барыс Кіт, Фрэнсыс Фукуяма, Станіслаў Шушкевіч, Барыс Стругацкі, Сяргей Юрскі ды іншыя).https://www.svaboda.org/embed/player/0/25684748.html?type=audio&platformType=self-embed&enablejsapi=1

Паўліна Сурвіла была сябрам Рады БНР і шмат рабіла для аб’яднаньня беларускай дыяспары на паўночна-амэрыканскім кантынэнце.

«Мне здаецца, найважней — гэта мець энэргію беларускасьці, — казала яна ў інтэрвію Радыё Свабода. —. Калі ўсе беларусы адчуваюць важнасьць незалежнай ідэнтычнасьці. Гэта значыць мець спосаб адчуваць беларускасьць без такога кантэксту, што „трэба баяцца“. Можна праз гэтую энэргію зьмяніць крышачку гэты „космас беларускі“, які цяпер, мне здаецца, вельмі сур’ёзны і вельмі цяжкі.

Вельмі-вельмі жадаю, каб усё, што людзі перажылі і перажываюць, прадукавала ў канцы канцоў пазытыўны мамэнт для краіны і для гэтых людзей. І што гэты год дасьць новае адраджэньне для гэтай краіны. Таму што гэтая краіна зашмат перажыла ў гісторыі. Проста трэба, каб новы мамэнт уявіўся. Жадаю, каб усе жылі ў мадэрным сьвеце, каб усе ведалі, што гэта значыць быць часткай сусьветнага грамадзянства. Для мяне гэта найбольшае пажаданьне».

У Паўліны Сурвілы застаўся муж Эрык, прафэсар музыкі, і два сыны 20 і 22 гадоў, Антон і Валік.

Categories: Падзеі

Дарагія сябры, беларусы!


На сённяшні дзень у Беларусі вельмі складаная сітуацыя з кантролем каронавіруснай эпідэміі. Беларускінарод кансалідуецца і дапамагае медыкам. Нажаль, дактары сення амаль не абароненыя ад інфекцыі: не хапае рэспіратараў, масак, аднаразовых камбінезонаў. Зразумела, што ад медыкаў і ад таго, як яны забяспечаны залежыць вельмі шмат. У большасці з нас у Беларусі жывуць бацькі, сестры, браты, сваякі і сябры, якім таксама можа спатрэбіцца медычная дапамога, альбо яны працуюць медыкамі і ім неабходна абарона ад каронавіруса на працоўных месцах ў шпіталях.


Згуртаванне Беларусаў Канады заклікае вас падтрымаць ініцыятыўную групу, якая арганізавала тэрміновы збор для дапамогі медыкаў у Беларусі ByCovid19 (COVID-19 Беларусь), спасылка на беларускую старонку кампаніі напрыканцы.

Ініцыятыўная група ужо дапамагае медычным установам ў гарадах, дзе ёсць успышкі каронавіруса і найбольшы недахоп сродкаў індывідуальнай абароны: Полацку, Наваполацку, Глыбокім, Смалявічах, Шуміліне, Міорах, Салігорску, Расонах, Гомлі і Гародне, Докшыцах.

І таксама Віцебску і Менску, дзе на сенняшні момант большасць захварэўшых на каронавірус.

У Віцебску гэта Чыгуначная і Інфекцыённая бальніцы, бальніца хуткай дапамогі.

У Менску – дзіцячая інфекцыённая бальніца, 10-ая, 6-ая, 4-ая, 2-ая клінічныя бальніцы, бальніца хуткай дапамогі, станцыя хуткай дапамогі, гарадзкі клінічны анкалагічны дыспансер, гарадзкая гінекалагічная бальніца перапрафіліраваная пад прыем пацыэнтаў з COVID-19. Акрамя гэтага на сенняшні момант есць больш за 300 заявак аб дапамозе з розных медустаноў і станцый хуткай дапамогі амаль з усей Беларусі.

Што робіць ініцыятыўная група: шукаюць і набываюць аднаразовыя сродкі індывідуальнай абароны, кіслародныя канцэтратары. У Германіі пачатая закупка безкантактных тэрмометраў і пульсаксіметраў для бальніц Беларусі. У некаторыя шпіталі Менска і Віцебска дастаўлены пральныя машынкі, каб была магчымасць праць халаты на працы, і не адвазіць іх дадому. Група вядзе пошук валанцераў і фінансавых сродкаў, кантакты з бізнэсамі, якія могуць аказаць дапамогу.

Мы, беларусы Канады, знаходзімся далека ад Радзімы, але сэрца не можа заставацца спакойным, калі мы ведаем, якая складаная сітуацыя ў Беларусі. І мы таксама можам дапамагчы фінансава! Сення складаны час і для нас, шмат хто застаўся без працы, але нават невялікі ўнесак будзе адчувальным і прынясе карыць!

Перавесці грошы з замежнай крэдытовай карткі ў Беларусь бывае складана, таму мы стварылі некалькі магчымасцяў перавесці сродкі праз канадыйскія платформы. Потым грошы цэнтралізавана будуць пераведзены у Беларусь для закупкі неабходных рэчаў. Справаздача будзе дасланая з Беларусі і разасланая ўсім ахвярадаўцам праз емэйл і апублікаваная на старонцы ЗБК у Фэйсбуку.


ЯК ПЕРАВЕСЦІ ГРОШЫ:
1. Крэдытовая або дэбітная картка – па спасылцы ніжэй


2. Interac – перавод можна зрабіць на емэйл help.razam@gmail.com. Security question – what disease, Answer – covid19


СПАСЫЛКА НА БЕЛАРУСКУЮ СТАРОНКУ КАМПАНІІ
https://bycovid19.com/

https://molamola.by/campaigns/2471?tab=about

Будзем разам і пераможам!

Categories: Падзеі

РАДА БНР ЗАКЛІКАЕ ДА РАШУЧЫХ МЕРАЎ ПА БАРАЦЬБЕ З КАРАНАВІРУСАМ

Рада БНР выказвае занепакоенасьць недастатковымі мерамі, якія прымаюць улады Беларусі ў сувязі з пандэміяй новага каранавіруса COVID-19.

Краіны Эўрапейскага Зьвязу, Паўночнай Амэрыкі, Азіі надзвычай сур’ёзна ўспрынялі цяперашнюю пагрозу. У многіх краінах уведзеныя строгія карантынныя меры.

Адначасова з гэтым Беларусь застаецца адзінай сярод краінаў Эўропы, чые ўлады ў цяперашняй сытуацыі дэманструюць лёгкадумнасьць, якая можа выліцца ў трагедыю для Беларусі.

Беларусь мае трагічны досьвед, калі недэмакратычная акупацыйная савецкая адміністрацыя ў часы Чарнобыльскай катастрофы праявіла злачынную халатнасьць і бязьдзеяньне, не прыняўшы неабходных мераў па абароне насельніцтва ад наступстваў аварыі на Чарнобыльскай АЭС. Бязьдзеяньне ўладаў БССР у 1986 годзе каштавала мільёнам беларусаў здароўя і гадоў жыцьця.

Недапушчальна, каб гэтая сытуацыя паўтарылася зноў.

Рада БНР заклікае беларускія ўлады да адкрытасьці і адказнасьці перад беларускім грамадзтвам, і патрабуе неадкладна прыняць усе неабходныя меры дзеля забесьпячэньня аховы здароўя людзей ва ўмовах пандэміі.

Categories: Падзеі

Дарагiя Суродзiчы Беларусы!

Ад iмя Рады Беларускай Народнай Рэспублiкi вiншую кожнага з вас, у Беларусi й дзе бы вы не знаходзiлiся ў сьвеце, з нашым сьветлым нацыянальным сьвятам. Незалежнасьць абвесьцiлi продкi ўсiх нас, перад тым як акупанты пачалi дэнацыяналiзаваць наш народ.

У 2019 годзе мы ўсе перажылi вялiкае шчасьце, бачачы мора бел-чырвона-белых сьцягоў на вулiцах Вiльнi, падчас пахаваньня Кастуся Калiноўскага й ягоных паплечнiкаў-змагароў. Усiм вам, хто спрычынiўся да гэтага слаўнага дня, хочу сёньня яшчэ раз падзякаваць з глыбiнi душы. Ганарылася я вамi, як нiколi! Тады пераканалася, што мы пераможам!

Нажаль, пасьля радасьцi прыйшлося перажыць вялiкую трывогу, калi Пуцiн намагаўся захапiць наш край. Дай Божа, каб гэта ўсё толькi было страшным кашмарам, якi мы мусiлi перажыць, каб усьведамiць сабе вартасьць для кожнага з нас незалежнасьцi нашай дзяржавы.

Пакуль што бальшыня з нас супакоiлася. Усё ж цяжка верыць, што чалавек, якога народ называе сваiм прэзыдэнтам, зможа стацца ягоным найбольшым здраднiкам.

Хочацца думаць, што людзi нашыя, а менавiта нашая моладзь, адчула, што незалежнасьць вартая таго, каб мы яе баранiлi ўсе, кожны як можа, шчыльнымi радамi.

Памятайце, што вас будуць паважаць у сьвеце й з вамi лiчыцца, толькi калi нашая дзяржава зойме пачэснае месца ў сям’i вольных народаў сьвету.

Дык трымайцеся, мае дарагiя Суродзiчы!

Жыве Беларусь!
Iвонка Сурвiлла
Старшыня Рады Беларускае Народнае Рэспублiкi

Сакавік 2020 г.

Categories: Падзеі

Дарагія сябры!

Шаноўная грамада!

Галоўная Управа Згуртавання Беларусаў Канады шчыра віншуе вас з найвялікшым беларускім нацыянальным святам – 

Днем абвяшчэння дзяржаўнай незалежнасці Беларускай Народнай Рэспублікі.

Гэты векапомны дзень, Дзень 25 Сакавіка, мы з гонарам завём Днём Волі.

“Цяпер мы, Рада БНР, скідаем з роднага краю апошняе ярмо дзяржаўнае залежнасьці, якая была накінута расейскім царызмам на наш вольны і назалежны край. Ад гэтага часу Беларуская Народная Рэспубліка абвяшчаецца незалежнай і вольнай дзяржавай…”

Болей стагодздзя назад гэтымі словамі Трэцяй Устаўной Граматы Рада Беларускай Народнай Рэспублікі абвесціла ўсяму свету аб нараджэнні вольнай і незалежнай Беларусі.  Ідэі 25 сакавіка сталі трывалым падмуркам беларускага нацыянальна-вызвольнага руху паўсюды, дзе б ні жылі беларусы. Дзяржаўніцкія ідэі БНР давалі жыцьцё і шырокі ўздым культуры і асветы і ў створанай бальшавікамі БССР, і ў Заходняй Беларусі, што да 1939 году знаходзілася пад Польшчай, дапамагалі змагацца і жыць падчас ваеннага ліхалецця, далі моц паваеннай беларускай эміграцыі па ўсім сьвеце. Сёння нельга сабе ўявіць ніводнай беларускай палітычнай арганізацыі ці партыі, ці ў Беларусі ці за яе межамі, ў аснову якіх не былі б паложаныя ідэі дзяржаўнай незалежнасці. Ідэі, каторыя сталі арганічнай часткай душы беларускага народу, яго натхненнем і сілай.   

Няхай жа святло Сакавіка падорыць вам надзею і сёння, ў гэты складаны для ўсіх нас час!

Няхай ідэалы незалежнай Бацькаўшчыны стануць вам ў гэты дзень зарукай моцнай веры ў будучыню! 

На вялікі жаль, ня можам вітаць ўсіх вас сёлета на нашых традыцыйных святкаваньнях і імпрэзах. Заклікаем аднак адзначыць гэты слаўны дзень там, дзе зможаце. З сям’ёй, блізкімі, роднымі. Уздыміце наш сьцяг, павіншуйце адзін аднаго, прачытайце верш, раскажыце дзецям пра гісторыю сваёй Бацькаўшчыны-  Беларусі! Помніце – гэта нашае Вялікае Свята!

Жыве Беларусь! 

Categories: Падзеі

Шаноўныя сябры! 
Усе мерапрыемствы Згуртавання Беларусаў Канады, якія павінны былі адбывацца ў беларускім цэнтры бліжэйшым часам адменены з-за пандэміі каронавіруса (COVID-19). Каліласка, сачыце за нашымі абвесткамі праз рассылку, Facebook: @ZBK.Toronto альбо https://belaruscanada.org/

Dear friends! With the COVID-19 (Coronavirus) pandemic the events of the Bellarusian Canadian Alliance are postponed until further notice. The health, safety and well-beign of our members and friends are our top priorities. Please follow our Facebook page: @ZBK.Toronto or https://belaruscanada.org/_ _ _Згуртаванне Беларусаў Канады

Categories: Падзеі

Дзень Волі-2020, Атава, 15 сакавіка, 13:30 (Sunday, March 15, 2020)

 

 

Паважаныя сябры,

Атаўскі аддзел Згуртавання беларусаў Канады і Беларускі інстытут навукі і мастацтва ў Канадзе шчыра запрашаюць вас на ўрачыстае святкаванне 102-х ўгодкаў Абвяшчэння Незалежнасці Беларускай Народнай Рэспублікі 15 сакавіка 2020 года, ў нядзелю.

Пачатак 13.30.

Адрас:

Nepean Creative Arts Centre

5 – 35 Stafford Road, Nepean, ON

K2H 8V8

Theatre Studio

Free parking

 

 У праграме:

 1. Віншаванне сп. Івонкі Сурвіластаршыні Рады БНР.

 2. Прэзентацыя 41-ага выпуска альманаха «Запісы» Беларускага інстытута навукі і мастацтва (Нью-Ёрк) галоўным рэдактарамгісторыкам і архівістам Наталляй Гардзіенка (Мінск).   Нумар прысвечаны  беларускай эміграцыі.

3. Беларуская дыктоўка.

4. Канцэрт.

5. Кава і пачастункі (спадзяемся на ваш удзел)

 Калі вы жадаеце прыняць удзел у канцэрце, калі ласка, кантактуйце Уладзю Шамецька (613) 686-5300

Калі ласка, запрашайце сваіх сяброў и знаёмых!

Будзем рады бачыць Вас на гэтай падзеі. 

Уваход вольны, ахвяраванні вітаюцца.

 Тэлефоны для даведак:

Наталія і Пётра Мурзёнкі – (613) 680-1114

Аксана i Сяргей Мазгавыя – (613) 733-7361

Уладзя і Юра Шамецькі – (613) 686-5300

Categories: Падзеі

Згуртаванне Беларусаў Канады і Беларускі Інстытут Навукі і Мастацтва запрашаюць

                                                                                                                        8 САКАВІКА, НЯДЗЕЛЯ, 12:30

Прэзентацыя 41-ага выпуска альманаха «Запісы» Беларускага інстытута навукі і мастацтва (Нью-Ёрк). Нумар прысвечаны  беларускай эміграцыі. Асноўная тэма — Беларуская Канада — прадстаўленаяпублікацыямі як пра з’яўленне беларусаў у гэтай краіне ў ХІХ — пачатку ХХ стст., гэтак і пра паваенных эмігрантаў ды сучасныя беларускія арганізацыі і ініцыятывы.

Альманах “Запісы” выдаецца Беларускім інстытутам навукі й мастацтва (Нью-Ёрк) ад 1952 года. У розныя часы выданне выходзіла ў Нью-Ёрку, Мюнхене, а ад 2002 года гэта сумесны Нью-Ёрска-Менскі праект. Сёння “Запісы БІНіМ” — адзінае друкаванае выданне, прысвечанае беларускай эміграцыі, яе гісторыі і сучаснасці.

Прэзэнтаваць альманах будуць галоўны рэдактар, гісторык і архівіст Наталля Гардзіенка (Мінск) і сябра Рэдакцыйнай Рады, аўтар шматлікіх матэрыялаў альманаху, архівіст Лявон Юрэвіч (Нью-Ёрк).

Таксама вас чакае выступ калектыва “Яваровы дзеці”!

Адрас: 524 St.Clarens Ave, Toronto

Уваход вольны, але ахвяраванні вітаюцца 

Даведкі: тэл. 416-876-8603,Facebook: @ZBK.Toronto

_ _ _

Згуртаванне Беларусаў Канады

Categories: Падзеі